Бокс бўйича мутлақ жаҳон чемпион Майк Тайсон Мадонна билан бирга қўшиқ куйлади. Бу ҳақда хонанданинг Facebook’даги саҳифасида хабар берилган.

Америкалик боксчи Iconic қўшиғини ёзишда Мадонна ва Chance the Rapper тахаллуси остида ижод қилувчи рэпер Чанселор Беннетт билан бирга иштирок этди.

Ушбу трек Rebel Heart альбомидан ўрин олади; мусиқий тўпламнинг тўлиқ кўриниши тақдимоти эса 2015 йил 10 мартда ўтказилиши кўзда тутилган.

Ўтган йилнинг декабрида номаълум шахслар янги альбомдан ўрин олиши керак бўлган қўшиқларнинг аксариятини интернетга чиқариб юборишган эди.

Мадонна қонунбузарларнинг бу ҳаракатини террорчилик деб баҳолаган ва альбомга олдиндан буюртма берганларга тўпламнинг олти қўшиғини iTunes онлайн-дўконида бепул қилиб қўйганди.

Майк Тайсон замонанинг энг машҳур спортчиларидан бири бўлиб, жаҳоннинг мутлақ чемпиони унвонига эга бўлган ва Гиннеснинг рекордлар китобидан ўрин олган.

Америкалик боксчи ўз профессионал фаолиятини 2005 йилда якунлаган ва шундан сўнг автобиография китобини ёзишга, промоутер сифатида ишлашга ва 55дан ортиқ фильм, сериал ва телешоуларда суратга тушишга улгурди.

Манба:Kun.uz