Oybekning tarjimai holi

Men Alimov Oybek Bahodirovich 1987 - yil 8 oktabr kuni Toshkent shahrida xizmatchilar oilasida tug'ildim. Oilam haqida qisqacha to'xtalib o'tadigan bo'lsam, oilada 4 kishimiz: ota - onam, akam va men.

Otam - Alimov Bahodir Turg'unovich (1962 yil, Toshkent shahri).

Onam - Alimova Nodira Sattorovna (1963 yil, Toshkent shahri).

Akam - Alimov Javlon Bahodirovich (1986 yil, Toshkent shahri.

Hamma jajji bolalar kabi bog'chaga, so'ngra 1994 - yil 29 - o'rta maktabning 1 - e sinfiga borganman. Shu maktabning 2 - sinfini tamomlagach, yangi uyga ko'chganimiz tufayli 3 - sinfni 39 - tayanch maktabida davom ettirganman. Yoshligimdan sport turlaridan futbolga qiziqardim. Darslardan bo'sh vaqtimda "Istiqlol" futbol maktabida, futbolning o'ziga xos sirlarini o'rganar edim. Hattoki futbol o'ynayotganimda oyog'imni ham sindirganman. 2003 - yilda 9 - sinfni tamomlagach, ba'zi sabablarga ko'ra 2 yil mobaynida o'qishni davom ettira olmadim. Hatto "Istiqlol" futbol maktabini ham tashlab ketdim. Ammo yoshligimdan sportdan tashqari musiqa san'atiga qiziqishim kuchli bo'lganligi sababli keyinchalik "Konsanans" nomli musiqa to'garagiga qatnashdim.

Nihoyat, 2005 - yilda Hamza Hakimzoda Niyoziy nomidagi Respublika musiqa kollejiga imtihon asosida o'qishga qabul qilindim. U yerda "Akadem xonandalik" bo'limida O'zbekiston va Qoraqalpog'istonda xizmat ko'rsatgan artist Serjanov Kenezboy Jumaboyevichdan tahsil oldim. Shu yilning noyabrida "Akfa Media" prodyusserlik markazi ochilgani va u yerda yakkaxon ijrochilikka qiziquvchi yoshlar o'rtasida tanlov o'tkazilayotgani haqida xabar topdim. Menda o'zimni sinab ko'rish uchun imkoniyat paydo bo'lgan edi va albatta bu imkoniyatdan unumli foydalangan holda tanlovda qatnashishga qaror qildim. Bu tanlovda kollejimizdan juda ko'plab yigit - qizlar ham o'z nomzodlarini ko'rsatishgan edi. Ular orasida sizga yaxshi tanish Nigora va Ziyodalar ham shular jumlasidandir. Tanlovda Nigora, Ziyoda va men g'olib deb topildik. Uzoq tayyorgarliklardan so'ng, ilk taronam "Yuragimda" efir orqali jarang sochganida o'zimni qo'yarga joy topa olmaganman. Men bilan birga Ziyoda va Nigoraga ham qo'shiq yozilib, uni ham efir orqali taqdim qilindi. Biroz vaqt o'tgandan so'ng, Nigoraga yana bir qo'shiq yozildi va uni duet shaklida kuylash rejalashtirildi. Bu duetdosh men bo'lib chiqdim. Yodingizda bo'lsa, Nigora bilan ilk duet qo'shig'imiz "Izlayman" edi. Ko'plab tinglovchilar tomonidan iliq kutib olindi.

Shundan so'ng rahbariyatimiz yana bir duet qo'shiq yaratish taklifini bildirdi va "Sen uchun" nomli duet tarona dunyoga keldi. Ikkinchi duet qo'shiq TV orqali taqdim qilingandan keyin bizni Oybek va Nigora dueti deb taniy boshlashdi. Intilishlarimiz va ijodimiz orqasidan ko'plab olqishlarga sazovor bo'ldik. Shu bilan birga ko'plab mukofotlarga erishdik. Jumladan, turli xil tashakkurnomalar, fahriy yorliqlar, 2006 - yil "Yil yangiligi" nominatsiyasida va eng asosiysi 2008 - yilda "Nihol" Davlat mukofotiga sazovor bo'lishimiz biz uchun kutilmagan holat edi. "Nihol" Davlat mukofotiga sazovor bo'lganimizdan so'ng, Oybek va men musiqiy bilimlarimizni yanada mustahkamlash uchun 2009 yilda O'zbekiston Davlat San'at institutiga imtiyozli tarzda qabul qilindik. Hozirda ushbu institutning "Estrada aktyorligi" fakultetining 1 - bosqich talabasimiz. 2010 yilga kelib "Akfa Media" prodyusserlik markazi bilan tuzgan shartnoma muddati o'z nihoyasiga yetganligi sababli ijodimizni mustaqil davom ettirishga qaror qildik. Muxlislarimiz bundan hech ham hafa bo'lishmadi. O'ylaymizki, kelajakda o'zimizning ijodimiz bilan dunyo miqiyosiga ko'tarilib, bundanda katta yutuqlarga erishamiz...


BLITS - SAVOLLAR
1. To'liq ism-sharifi: Alimov Oybek Bahodirovich (Oybek va Nigora dueti).
2. Laqabi yoki tahallusi: Bebek.
3. Tug'ilgan joyi va vaqti: Toshkent shahri, 8 oktyabr 1987 yil soat 10:00 da.
4. Vazni: 70 kg.
5. Bo'yi: 172 sm.
6. Millati: O'zbek.
7. Tabiati: Og'ir, bosiq. O'zini-o'zi tabiatan shunday bo'lgani uchun hurmat qilgisi kelib ketadi.
8. Oilaviy sharoiti: Bo'ydoq.
9. Yoshlikdagi hato uchun eng og'ir jazo: Omborxonaga qamab qo'yishgan.
10. Birinchi bo'sa: 11 yoshida oromgohda (Oromgohda o'tkazilgan o'yinda yutqazgan Oybek, bir qizdan bo'sa olishga majbur bo'lgan, aytishiga qaraganda, juda hayajonlangan).
11. Birinchi bor gaz pechi oldida: 7 yoshida tuxum qovurgan.
12. Sevimli aktyor va aktrisasi: Jim kerry
13. Sevimli xonandasi: Shahnoz, guruhlardan esa "Backstreet boys".
14. Sevimli filmi: Nazad v budushe va "Eys Ventura".
15. Sevimli qo'shig'i: Shahnoz ijrosidagi "Yuraklar" taronasi.
16. Sevimli taomi: Palov.
17. Sevimli ichimligi: Ayron (aytishicha, ichganida rohatlanar ekan).
18. Sevimli sport turi: Futbol (oyog'ini ham sindirishga ulgurgan).
19. Sevimli mashg'uloti: Musiqa yozish.
20. Sevgan insoni: Yo'q (Orzusidagi qiz topilmagan).
21. Qo'llanadigan atiri: Arktic Blue.
22. Shiori: Qo'lingdan kelsa yaxshilik qil, kelmasa yomonlik ham qilma!
23. Mukofotlari: 2008 - yil Nihol davlat mukofoti.
24. Ko'p ishlatadigan so'zi: Nigor bu yoqqa qarang?!
25. Shaxsiy avtomobil markasi: Yo'q.
26. Agarda xonanda bo'lmaganida: Kosmonavt.
27. Orzusi: Orzulari serob.
28. Armoni: Yo'q.
29. Shaxsiy e-mail manzili: oybek@oybeknigora.uz
30. Shaxsiy sayti: oybeknigora.uz

Nigoraning tarjimai holi

Men Ismoilova Nigora Abduvahobovna 1988 - yil 12 sentabr kuni Toshkent shahrida ishchilar oilasida dunyoga keldim. Oilada 7 kishimiz: ota - onam, 3 opam, men va ukam.

Otam - Ismoilov Abduvahob To'htasinovich (1958 yil, Toshkent shahri) avtobus haydovchisi.

Onam - Rahimova Adashxon Abdurahimovna (1958 yil, Andijon shahri) bolalar shifokori.

Opam - Ismoilova Munira Abduvahobovna (1980 yil, Toshkent shahri).

Opam - Ismoilova Zamira Abduvahobovna (1982 yil, Toshkent shahri).

Opam - Ismoilova Nargiza Abduvahobovna (1984 yil, Toshkent shahri).

Ukam - Ismoilov Zohid Abduvahobovich (1990 yil, Toshkent shahri).

3 yoshga qadam qo'yar qo'ymasimdan bolalar bog'chasiga, keyin 1995 - yil 179 - o'rta maktabning 1 - a sinfiga borganman. Maktabda juda a'lochi bo'lmasamda, bayram tadbirlarida qatnashishga juda qiziqar edim. O'sha kezlarda mahallamizda Fotima va Zuhra Ziyomuhamedovalar boshchiligidagi noan'anaviy bolalar qo'shiqchilik tanlovi o'tkazildi. Tanlovning noan'anaviyligi shundaki, u yerda sog'lom bolalar bilan bir qatorda, ko'zi ojiz va nogiron bolalar ham o'zlarining iste'dodlarini sinab ko'rishlari mumkin edi. Tabiiyki, musiqaga qiziqishim kuchli bo'lganligi sababli tanlovda ishtirok etdim. Omadim kelibmi, tanlovda g'olib bo'ldim.

So'ngra tanlab olingan bolalar jamoasidan hor tashkil qilindi va "Uz bell" deb nom berildi. Hor jamoada biz qo'shiqchilik sirlarini o'rgandik. Bu yerda men juda ko'plab do'stlar orttirdim. Ziyoda bilan ham aynan shu yerda tanishganman. Ziyoda bo'sh vaqtlarida "Tantana" guruhi haqida menga faxrlanib gapirib berar edi. O'z-o'zidan menda shu guruhning a'zosi bo'lish istagi paydo bo'ldi. Bir kuni hor jamoamiz noma'lum sabablarga ko'ra yopildi. Juda hafa bo'ldim, lekin Fotima va Zuhra opalar meni "Tantana" guruhiga taklif qilishganida o'zimda yo'q hursand bo'lib ketdim. Musiqiy bilimlarni mukammallashtirishni "Tantana" guruhi bilan davom ettirdim. Biz guruh bilan juda ko'plab muvaffaqiyatlarga erishdik va Davlat konsert dasturlarida munosib ishtirok etardik. 2004 yilda maktabni tamomlab, Hamza Hakimzoda Niyoziy nomidagi Republika musiqa kollejiga imtihon asosida qabul qilindim. 2 - kursda tahs?l olayotganimizda Fotima opa menga "Akfa Media" prodyusserlik markazi ochilgani hamda yakkaxon ijrochilikka qiziquvchi yoshlar o'rtasida tanlov o'tkazilayotgani haqida aytib qoldilar. U yerda qatnashuvchilar orasida Oybek va Ziyoda ham bor edi. Yana bir bor omad kulib boqib men, Ziyoda va Oybek g'olib bo'ldik.

Ana shundan keyin "Akfa Media"da ijodimiz boshlandi. Menga bir qo'shiq yozildi, lekin qo'shiq duet shaklida ijro qilinishi kerak edi. Bu duetdosh Oybek bo'lib chiqdi. Ilk bora Oybek bilan kuylagan "Izlayman" duet qo'shig'i ko'pchilikka manzur bo'ldi. Shundan so'ng rahbariyatimiz yana bir duet qo'shiq yaratish taklifini bildirishdi va "Sen uchun" nomli qo'shiq dunyoga keldi. Unga ham o'z navbatida klip suratga olinib, xalqimizga taqdim qilindi. Qisqa vaqt ichida qo'shiq ommalashib, hit - paradlarning yuqori pog'onasiga ko'tarildi. Shundan so'ng, men va Oybekni, Oybek va Nigora duet guruhi sifatida taniy boshlashdi. Intilishlarimiz va ijodimiz orqasidan ko'plab olqishlarga sazovor bo'ldik. Shu bilan birga ko'plab mukofotlarga erishdik. Jumladan, turli xil tashakkurnomalar, fahriy yorliqlar, 2006 - yil "Yil yangiligi" nominatsiyasida va eng asosiysi 2008 - yilda "Nihol" Davlat mukofotiga sazovor bo'lishimiz biz uchun kutilmagan holat edi. "Nihol" Davlat mukofotiga sazovor bo'lganimizdan so'ng, Oybek va men musiqiy bilimlarimizni yanada mustahkamlash uchun 2009 yilda O'zbekiston Davlat San'at institutiga imtiyozli tarzda qabul qilindik. Hozirda ushbu institutning "Estrada aktyorligi" fakultetining 1 - bosqich talabasimiz. 2010 yilga kelib "Akfa Media" prodyusserlik markazi bilan tuzgan shartnoma muddati o'z nihoyasiga yetganligi sababli ijodimizni mustaqil davom ettirishga qaror qildik. Muxlislarimiz bundan hech ham hafa bo'lishmadi. O'ylaymizki, kelajakda o'zimizning ijodimiz bilan dunyo miqiyosiga ko'tarilib, bundanda katta yutuqlarga erishamiz...


BLITS - SAVOLLAR
1. To'liq ism-sharifi: Ismailova Nigora Abduvahobovna.
2. Laqabi yoki tahallusi: Maktabda "Knopka".
3. Tug'ilgan joyi va vaqti: Toshkent shahri, 12 sentyabr 1988 yil soat 23:45 da.
4. Vazni: 47 kg.
5. Bo'yi: 155 sm.
6. Millati: O'zbek.
7. Harakteri: Injiq, qaysar, hushchaqchaq.
8. Oilaviy sharoiti: Turmushga chiqmagan.
9. Yoshlikdagi hato uchun eng og'ir jazo: Burchakka turg'azishgan yoki uxlatib qo'yishgan.
10. Birinchi bo'sa: Aytishicha, qiz bolaga to'g'ri kelmaydi.
11. Birinchi bor gaz pechi oldida: 7 yoshida ukasi bilan birga kartoshka qovurgan.
12. Sevimli aktyor va aktrisasi: Murod Rajabov, Rano Yarasheva , Silvestor Stalone, Anjelina Joli.
13. Sevimli xonandasi: Ajratmaydi.
14. Sevimli filmi: qolaversa ujastik janridagi filmlarni sevib tomosha qiladi.
15. Sevimli qo'shig'i: Tanlamaydi
16. Sevimli taomi: Norin. Yoz kunida esa "Okoroshka".
17. Sevimli ichimligi: Ananasli sharbat.
18. Sevimli sport turi: Futbol va suzish.
19. Sevimli mashg'uloti: Onasi bilan suhbatlashish va sokin joyda aylanish.
20. Sevgan insoni: (O'ylanib).
21. Qo'llanadigan atiri: Eclat
22. Shiori: Faqat oldinga (Muxlislar hursandchiligi bizning eng katta mukofotimiz).
23. Mukofotlari: 2006 - yil "Yil yangiligi" nominatsiyasida va 2008 - yil "Nihol" Davlat mukofotiga sazovor bo'lgan.
24. Ko'p ishlatadigan so'zi: Yo'q.
25. Shaxsiy avtomobil markasi: Yo'q.
26. Agarda xonanda bo'lmaganida: "Logoped" bo'lardi (shu o'rinda yosh bola sifatida bir oz gapirib o'tdi).
27. Orzusi: Orzulari serob.
28. Armoni: Yo'q.
29. Shaxsiy e-mail manzili: nigora@oybeknigora.uz
30. Shaxsiy sayti: www.oybeknigora.uz
31. Sevimli rangi: Sariq.
32. Sevimli guli: Atirgul.
33. Sevimli fasli: kuzning ohirgi oylari.